Maraia del Porto

Articoli

 ST’ANO TI NO TE POL MANCAR  (Portoamici 2012)

L’ano passà mi son ‘ndà a sta festa qua 
E
ala fine avaria basà
Quei che se là inventà
Con tanta passion e professionalità
Quei che là ghe stado
In giro i là contado
E no se sa in quanti le bale i sà magnà
Par no essar stadi là.
Bei, bruti, richi e sensa schei
Ma tuti col soriso nel ritrovarse tra fradei.
Gente dala Piccola, dala Ciesa e dal bar da Renso….
Quanta emossion quando ghe penso!
Da de là de l’adese, dale montagnete e dala latteria
parea rivasse la cavaleria,
insoma, un mar de gente che non volea più andar via
anca quando la festa l’era sa finia.
Jera poche le criniere de leon
Ma tante le teste liscie come pomoli de oton
Ala fine però sempre tuti stessi, coi oci iluminadi
Nel rivedar i amici ritrovadi.
E sà dir dele nostre butele del Porto:
i meio fruit de tuto l’orto
done mature je diventade
ma ancora gnoche je restade:
tete a bomba o con do’ marandele
fra tute sempre le più bele.
A casso!...quanti ricordi all’indrio
a contarli no se ghe tegnea più drio
e dentro tanta emossion
da scondar col fassoleto drio a un canton.
St’ano ti no te pol mancar
Se le to’ raise al Porto te vol ritrovar;
Sarà un festoon da colpi de conòn,
Tra le face de la tò infansia che ‘indrio te la portarà
In ‘na sera che nela storia restarà.
E quando ala fine te andarè in leto
Te te indormessarè con sorisin de un buteleto
.
..e questo te lo prometo!
O me racomando, a che te speto!!!

Bingo


 

LE MONTAGNETE  (Una zona di Porto San Pancrazio - 2011)

Son sentà con la testa tra le man su sta murèta e guardo fisso sta casèta.
E ti, dedrìo a quela ringhiera te ricòrdito sà ghera?
Sto pensando a quel che ‘na olta gh’era qua, a tute quele ch’emo combinà,
ma sopratuto a quel che è sta e che mai ritornarà.
Quante bici sarà sta desfà, un colpo la sèla, la forcela o la pedivela,
‘na cadena cascà, la rua sbusa e, come sempre, braghe sbregade
e sui senoci bele sgratonade. Na sugada de muso, ‘na topa sul buso,
‘na disinfetadina con l’alcol bechin, un bel cerotin e via de novo
su e sò par quel saltin. E ti che te me scolti... se non t’é capìo vienme drio.
La prima olta che l’emo vista l’era solo un disegneto su un fumeto
e no l’è che l’abbia fato un gran efeto, me ricordarò sempre
quando l’ho vista fotografà e stampà su quela rivista: in un momento
ho capìo, l’è da alora che la gnoca ghe coro drio! Quante prime olte
in chel posto, gh’eto in mente che la olta là, a qualche nono l’era stà rubà,
sensa filtro e con du cerini l’è capitada, taca ti, taco mi, l’emo tuta spuaciada
ma emo fato la nostra prima fumada, l’è stà proprio ‘na matonada e,
peso ancora, non se l’emo più cavada. T’è vegnù a la mente in do’
l’era la capana de foie seche, asse carolade e cartoni, la sarea sta ‘na
villa par i barboni, ma anca se ogni giorno se gh’è sontava un puntel,
par noialtri bocia l’era proprio un bel castel. Là soto el muro faseimo
le prove col carburo coi bussolotti del caffè, quei de fero, faseimo tremar
el mondo intiero. Gh’era uno che el g’avea un pimpinel col manegheto,
la mare l’era un sasso sul mureto, ore e ore a bàtar col legneto prima
de tacàr el mitico foghèto. Le lengue rosse arancio che brusava
li de fianco le fasea come da banco e i sciensiati, senté su un carton,
i fasea prove tecniche de combustiòn: legno,carta,stagnola,
plastica che cola gose de mile colori, el rame dalla fiamma verdeblu
no lo desmentegarò più, e alla fine sòra ala mota el gran copertòn
dal fumo nero, denso e spusòn. Te vedo, te vegnù l’ocieto lustro,
te ghe stè proando gusto a scoltar de la tò infansia. Te se ingropa la bugansa
a sentir sta storia qua, sera ioci che te porto là... Erimo tanti, tuti fradei,
bei, bruti, richi e sensa schei, gh’era le grasiele e le ciclocross e,
beati lori, le saltafoss, ma l’unica roba veramente importante
l’era pedalar che no se sa, par rivàr davanti, rossi sfogonà e sensa fià.
Eèè..sito imbriago o indormensà? Eto mia capìo ‘ndo l’è sto posto qua?
L’era el ritrovo par definisiòn, el finiva al gran saltòn, l’era el nostro
posto preferito par le discussiòn o par smaltìr le delusiòn, par sugàr con pice,
figurine e botòni. Te ricordito? G’aveimo i tubeti de otòn par spuàr le marandele,
lusèrtole sensa pele nel scatolìn, le canète con l’uncìn e tanta voia de far casìn.
Qualcun l’è sposà, ‘n’altro divorsià, dei altri iè andà a star lontàn,
chisà se i tornarà, dei altri ancora, i meio, noi vedaremo più, te sè, el la
volui Gesù, par far laòri importanti visìn a lù, con altri ancora quando se
incrocèmo manco se saludèmo. Eco, me sta scapando el sogno, el se disolve
in quel polvaròn, el sòl l’è tramontà e tuti i bocìa a casa iè andà.
E noialri semo davanti a ste birète..ma te ricòrdito mia quanto
bele iera le nostre montagnete?

Bingo

 

Share
Sei qui: Pagina iniziale